Rabu, 25 Ogos 2010

Uludo Ginawo Miampai Dot Taqwa


Muslimin tobpinai kou ngawi;

Mamason oku kumaa dikoyu toinsanan, om kumaa nogi kawagu tinanku; akouno pogiroto tokou ot taqwa montok dot ALLAH SWT.

Miagal dilo noboros nogi dot ALLAH SWT hilo id Al-Quran, it rati dau sokiro-kiro :

"Oi oinsanan kou it kinotumbayaan om ayakin kopiyo montok do kinorohingan (montok dot ALLAH SWT), rosiyai no om jagaai no hak-hak dot ALLAH SWT - om iri no ot TAQWA - igitai duyuno dit otopot-topot ino kotumbayaan duyu. Om kaada kouno kasaga' dot apatai suwai ko id ugama Islam"

Tobpinai kou ngawi;

TAQWA nopo nga - memiara' tokou dot nuu nopo it sinuhu om pinatatap mantad dot ALLAH SWT, om piaraon tokou nogi kawagu it nuu nopo ii pinantang Dau id koposi-posion dot ugama tokou.

Komoyon nopo dot TAQWA nga, jagaan toi ko piaraon tokou kopio-pio ot nuu nopo it hak-hak dot ALLAH SWT kumaa id daton. Haro gima it komoyon dot Halal, haro nogi it Haram, Sunnah, it Makruh om it Harus id ugama tokou. Haro it Wajib - toi ko it Fardhu miagal dot Sambayang (Solat), puasa maso-maso id wulan Ramadhan, zakat om haji. Ilo nopo nga mositi dot maan tokou pajalano. Mositi tokou dot tunayon.

Suwai ko ilo, haro nogi it komoyon dot Haram, miagal dot Syirik (manamba' suwai ko ALLAH SWT), mangakan dot wogok - turak om bakas, magawuk toi ko monginomol, mogi ampahu (berzina), monindaat (sihir), mongintutun, popimboros dot rahsia om keaiban dot wokon, oburutak ot kabang om ogumuu po it au obuli. Nung alanggar tokou ilo haram nga kaanu tokou nogi dot dusa' om katagadan - murka - mantad dot ALLAH SWT.

Nung arajin om osontol tokou papapanau dilo miagal dot Sambayang nga - kaanu tokou nogi dot pahala, sinunduan om barakat mantad id ALLAH SWT.

Boros kad ALLAH SWT id Suroh At-Tolaaq 2-3:

"...Om isaai nopo it poinhunung - pointulid kasari ginawo kumaa id ALLAH id koposion dau nga, anaan nogi Dau dot ralan panalasayan mantad dot nuu nopo it kobolingkangan toi ko masalah id koposion dau. Om anaan nogi Dau dot rejeki mantad ralan dit au diyau asangka-sangka".

SubahanAllahil 'Aziim...

Ka kawagud ALLAH SWT :

"...Om isai-sai nopo it poinlahis kasari ginawo kumaa id ALLAH nga, anaan nogi kawagu Dau dot kasanangan - toi ko kagaanan - id nuu nopo urusan dau..."

Boros susuhut kawagu mantad ALLAH id Suroh At-Tolaaq dilo :

"Mimang ilo nonno kopiyo (bertaqwa) suhu 'd ALLAH SWT montok dikoyu ngawi (miagal mamajaga diti ugama om popogirot kasari dot kotumbayaan - iman - kumaa id ALLAH SWT). Om isai-sai nopo it bertaqwa kasari dot ALLAH nga ompunan nogi Dau (ot dusa-dusa dau), om hopuson / tagakon - pulagan nogi 'd ALLAH it kasala'an-kasala'an dau, om tambaan nogi kawagu dot pahala om pahala dit togumu..."

Tobpinai ngawi;

Mimang ogumu' kopiyo komoyon dot ugama hiti id pomogunan. Haro nogi it notutunan tokou dot Budha, haro ot Hindu, om haro nogi Sinto; suwai ko ilo haro nogi ot Yahudi, ilo Kristian om ogumu' po it suwai.

Nga tobpinai... kotumbayaai no doho, ingga po suwai ugama dit otopot ko iti ISLAM. Mimang, nabi-nabi om rosul-rosul it pogulu po ko e Nabi Muhammad saw nopo nga Islaam ngawi ugama diolo. Nga, it minamaraag nopo dilo nga it pongikut-pongikut toi ko tumatanud diolo. Tarmasuk di kitab-kitab po nga minaan no pudolio, om okon noddi oroginal.

Tobpinaiku ngawi;

Salagi pod haro ilo Al-Quran - nga InsyaAllah - osukup tokou po do tigiton om apanggor po'd poinpasi. Alansan tokou do au asasat om apalid mantad id ralan dot otulid om alahis. Alansan nogi 'd tatap kotutun tokou di honggo kopiyo e Tuhan toi Minomorun e' totopot. Kotumbayaai no, ALLAH SWT ilo no Tuhan tokou!!!

ALLAH SWT diti - iso' no - satu / ahad ka'd malayu. Ingga ot ganding Dau dot suwai. Nung oporlu ot ALLAH 'd pambantu, kirati do okugui Iyau. Iso iti ALLAH. Okon ko duwo, okon ko tolu, okon ko hopod, okon nogi ko hatus om okon nogi ko riyong-riong.

ALLAH SWT no ot apatut dot pomorujukan tokou sokiro nopo'd haro o masalah. Okon ko pasambaon toi ko pasubakon tokou dit patung, kayu nunuk, watu, pampang om nuu nopo ii suwai. Miagal nopo'd sumakit tokou, nga it papatahak nopo kawagu'd kosihatan nga ALLAH ii. Nung opurimanan tokou nopo'd inggao - aiso poddi ot ralan suwai id koposion nga - it totopot nopo nga haro po ALLAH 'd papatahak dot tuduk toi ko it komoyon do taufiq, hidayah om irsyad.

ALLAH SWT - kinorohingan tokou diti - isoo ii. Iso' no'o. Ingga nogi ot tanak om au nogi maganak. Okon ko miagal daton tulun tu oporlu dot koruhang om tanganak.

Tuduk ka do ALLAH id Suroh Al-Ikhlas 1-4:

"(Oi Nabi Muhammad) poboroso' no diolo ngawi - ALLAH nopo nga iso' noo. ALLAH nonno ot hontolon om kaharapon ngawi dot winorun. Au nogi pinaganak nga lebih-lebih po'd au maganak. Om ingga ot iiso' pod suwai ot kuasa do kaagal dau - ingga nogi ot kougu dau".

Alansan oku 'd karati kou diti sinurat-ku. Sundung po'd au alahis ot karalan-ralanon diti borosku nga alasan oku nogi'd haro kasaaari ot gatang dau montok daton toinsanan. Ameen...

Miagal - "Budak baru belajar" - ka diolo boh...


Sinurat-ku ii

Abu Miftah
15 Ramadhan 1431H

0 ulasan:

Catat Ulasan

Komentar Anda...

Nota: Hanya ahli blog ini sahaja yang boleh mencatat ulasan.